Recursos didácticos para traballar o 25N na aula

Quedan uns días para a celebración do 25 de novembro, o Día Internacional para a Eliminación da Violencia contra a Muller, un tema moi importante para Gadis co que levamos varios anos solidarizándonos a través da participación en iniciativas que traballan para a súa erradicación. Por desgraza, a violencia contra as mulleres e as nenas segue a ser unha das violacións dos dereitos humanos máis estendidas e xeneralizadas no mundo. Estímase que unha de cada tres mulleres foi vítima de violencia física e/ou sexual polo menos unha vez na súa vida. Os esforzos que se dedican á súa eliminación son insuficientes e é necesario tomar conciencia sobre a importancia da prevención para focalizalos. Nese sentido, as etapas educativas iniciais revélanse como unha fase crucial. Por iso, hoxe queremos compartir unha serie de recursos didácticos que poden facilitar ao profesorado de distintos niveis educativos o traballo de concienciación e sensibilización sobre o tema na aula. Así, contribuirán a desenvolver a capacidade de detección non só de situacións nas que se exerce violencia sobre as mulleres e as nenas, senón tamén de discriminación por razón de xénero. Queres saber máis? Segue a ler!

A violencia contra as mulleres

De acordo coa información de ONU Mulleres, a pandemia, os conflitos e o cambio climático aumentaron a posibilidade de que mulleres e nenas se convirtan en vítimas de violencia e xeraron novas ameazas, socavando aínda máis a súa vulnerabilidade. Con todo, non se conta con información clara sobre a forma na que os países están a integrar a prevención en diferentes sectores como a educación, a saúde, o desenvolvemento económico e a protección social. Por ese motivo, este ano, a campaña da ONU 16 Días de activismo pretende coñecer as accións que se están a levar a cabo. Co lema “ÚNETE! Inviste para previr a violencia contra as mulleres e as nenas”, nesta edición búscase coñecer a importancia que a cidadanía e os gobernos conceden á erradicación da violencia contra as mulleres e as nenas.
Esta violencia segue relativamente silenciada por un sistema que facilita a impunidade de quen a comete, así como a estigmatización social e a vergoña de quen a sofre. Un punto de inflexión para fomentar o cambio pode xurdir a través da educación na aula.

25N na aula

Para o equipo de Gadis, é urxente frear a violencia contra as mulleres e as nenas. Por iso, decidimos sumarnos á campaña da ONU, buscando recursos didácticos de institucións, organismos, centros educativos e docentes que perseguen a transformación das normas sociais daniñas e o apoderamento das mulleres e das nenas. Aquí deixamos unha batería de ideas para que o profesorado poida traballar o 25N na aula ordenada por etapas educativas:
– EDUCACIÓN INFANTIL

Encantounos a proposta do Goberno de Canarias para a creación dun Recuncho dos coidados nas aulas de infantil! Apostando por unha metodoloxía que adoita utilizarse con frecuencia nesta etapa educativa (a dos recunchos), xérase un espazo fixo que se converte no punto de referencia para nenos e nenas en materia de coidado mutuo e empatía. Os nenos e as nenas contribúen á decoración do espazo, por exemplo, con debuxos que representen actitudes positivas cara aos demais ou coa colocación de elementos como coxíns que lles brinden comodidade. Aos poucos, van construíndo ese punto ao que acudir cando sintan certas emocións (tristeza, frustración, enfado etc.). Cando os compañeiros e compañeiras detectan que hai alguén nese recuncho, acudirán a prestar o seu apoio. É unha forma sinxela e participativa para fomentar un lugar de respecto e coidado na aula, incidindo na prevención da violencia de xénero mediante a promoción dunha cultura de paz e coidados.
No blog do CEIP Victoria Díez de Hornachuelos (Córdoba) podes consultar a proposta de actividades que realizaron para o alumnado de infantil con motivo do 25N. Coa creación de catro zonas de talleres simultáneos, abordaron conceptos como o bo trato, o consentimento e os estereotipos.
– EDUCACIÓN PRIMARIA
O Goberno de Canarias tamén desenvolveu unha Guía didáctica con distintos recursos para traballar a igualdade de xénero e sensibilizar sobre a violencia contra as mulleres. As súas propostas están separadas por niveis educativos e inclúen unha estimación da duración da actividade. A primeira parte da guía ofrece materiais máis sinxelos destinados a alumnado de infantil e do primeiro ciclo de primaria, para logo ir aumentando a complexidade dos conceptos tratados enfocándose no alumnado dos cursos superiores. As ideas son moi diversas: desde preguntas, lecturas e xogos ata vídeos e glosarios.
– EDUCACIÓN SECUNDARIA

O Goberno de Aragón tamén compartiu unha serie de recursos para concienciar sobre a igualdade de xénero e combater a violencia contra as mulleres. Desde talleres de rap creativo impartidos en centros ou un Equitrivia ata unidades didácticas que pretenden ser unha ferramenta útil para todo o profesorado da ESO que queira colaborar na construción dunha sociedade baseada no respecto e a igualdade de dereitos e oportunidades.
En Navarra, o sindicato Steilas desenvolveu unha unidade didáctica para ESO e Bacharelato titulada Desenmascarando a violencia. O seu obxectivo é contribuír a identificar as violencias que suceden nos centros e proporcionar estratexias para poder responder a elas de maneira colectiva.
E ti? Vaste unir a esta campaña? Cóntanos!