![](https://www.gadis.es/saludable/wp-content/uploads/2023/05/LETRAS-GALEGAS_GADIS_Fonte-Real-Academia-Galega-Coleccion-Castro-Paris.jpg)
Día das Letras Galegas 2023 en Gadis
Este mes volvemos celebrar a literatura e, nesta ocasión, toca festexar a da nosa terra. O Día das Letras Galegas é a data na que as galegas e os galegos homenaxeamos a cultura e a literatura da nosa comunidade. Coincidindo co 60 aniversario da celebración e os 110 anos do seu nacemento, nesta edición réndese tributo á figura de Francisco Fernández del Riego, que foi o inspirador da creación desta conmemoración. O autor lucense dedicou toda a súa carreira a traballar pola cultura galega e, entre o seu legado, atópase a Editorial Galaxia. Esta empresa, na que colaborou man a man con Ramón Piñeiro e Xaime Isla Couto, é a que ten máis significado histórico de cantas editoriais existen en Galicia. Un fito máis nunha vida dedicada á galeguización das institucións e, en xeral, de toda a sociedade galega. En Gadis non queremos deixar pasar a oportunidade que nos ofrece este día de recoñecer a importancia das nosas letras e conmemorar o labor de Fernández del Riego. Queres saber como imos facelo? Segue a ler!
Francisco Fernández del Riego
Nacido en Vilanova de Lourenzá (Lugo) en 1913, Francisco Fernández del Riego foi escritor, columnista, editor e político. Membro da xeración de intelectuais que deron continuidade ao ideario do Grupo Nós, converteuse nun loitador cultural incansable que obtivo o respecto xeral das personalidades da súa época e mostrouse sempre aberto á diversidade das manifestacións do galeguismo. No seu caso, foi un dos maiores representantes do galeguismo progresista e figura clave da resistencia durante o franquismo. De feito, o seu compromiso político converteuno en represaliado, tendo que abandonar o seu posto de profesor universitario en Santiago de Compostela e instalarse en Vigo, onde impartiu clases particulares. A principios da década dos 50, foi un dos fundadores da Editorial Galaxia, que desempeñou un papel central na resistencia cultural de Galicia, publicando unicamente obras en galego.
En 1960, Francisco Fernández del Riego ingresou como membro de número na Real Academia Galega (RAG). Tres anos máis tarde, contando co apoio de Ferro Couselo e Gómez Román, logrou que a institución dedicase a Rosalía de Castro o primeiro Día das Letras Galegas, coincidindo co centenario de Cantares Gallegos. O seu nomeamento como presidente da RAG en 1997 significou un cambio radical nas actividades da institución, que se reactivaron significativamente e adaptáronse aos novos tempos. Presidiu a Academia ata 2001.
A súa obra escrita é moi abundante e tocou practicamente todos os xéneros. Colaborou en case todos os xornais de Galicia e nas revistas máis representativas. Ademais, participou en numerosos libros, propios e colectivos, traballos que, moitas veces, asinou con pseudónimos (Salvador Lorenzana, Cosme Barreiros, Adrián Solovio ou Adrián Soutelo). Entre os seus ensaios máis representativos, case sempre relacionados coa produción literaria galega, atópanse Galicia non espello (1954), Historia da literatura Galega (1951) e Escolma de poesía galega. Os contemporáneos (1955), entre outros. Tamén cultivou a literatura de viaxes con volumes como As peregrinacións xacobeas (1983), A pegada dás viaxes (2000) ou Portugal norteño (2000) e conta con diversas monografías sobre autores da cultura galega. No ámbito da ficción, conta con novelas como O cego de Pumardedón (1992), O río do tempo. Unha historia vivida (1990) e Camiño andado: memorias (2003).
A súa traxectoria foi recoñecida con varias distincións, nas que cabe destacar o nomeamento de doutor honoris causa pola Universidade de Vigo, o Premio Trasalba ou a Medalla Castelao.
Gadis e as Letras Galegas
En Gadis, sempre mantivemos un vínculo moi estreito co Día das Letras Galegas, preparando iniciativas nas que coidamos ata o último detalle para celebralo, como mostra do compromiso firme que mantemos coa cultura galega:
– Máis de dúas décadas apoiando a creación e difusión de obras literarias.
– Máis de 360.000 exemplares repartidos.
– Creación de proxectos que contribúan ao impulso de autoras e autores emerxentes e consagrados.
Nas edicións de 2021 e 2022 puxemos en marcha os proxectos 15 voces da nova poesía galega, volume que recollía traballos de varios autores e artistas galegos e reflectía a calidade e a variedade de voces novas do ámbito literario de Galicia, e Versos na rúa, que pretendía achegar á vida cotiá da cidadanía o traballo de oito autores e autoras de épocas diferentes e moi representativos das nosas letras.
Este ano volvemos festexar este día cun proxecto moi especial. Da man de varios artistas galegos, preparamos o fanzine Tirabeque, do que distribuiremos 30.000 unidades nos nosos supermercados. Ademais, repartiremos 30.000 bolsas e marcapáxinas para conmemorar a figura de Francisco Fernández del Riego e sortearemos 35 packs dunha camiseta e un caderno nas nosas redes e na nosa web de Letras Galegas. Pero isto non é todo! Supermercados Gadis acaba de asinar un convenio de colaboración coa Consellería de Cultura, Educación, Formación Profesional e Universidades para promover o uso do galego nas plataformas dixitais. Así, pretendemos ampliar a conmemoración das nosas letras para chegar aos galegos e galegas máis novas.
Vés celebrar o Día das Letras Galegas a Gadis?