Déficit de vitamina B12: síntomas e consecuencias | Gadis
A vitamina B12 é unha vitamina hidrosoluble moi importante para o teu organismo. Non en balde, é a encargada, entre outras funcións, de manter sas as neuronas para un óptimo funcionamento do cerebro e do sistema nervioso. Hoxe imos coñecer que lle ocorre ao teu corpo se presenta un déficit de vitamina B12.
Esta vitamina é moi importante tamén para a formación dos glóbulos vermellos do sangue. Doutra banda, contribúe á súa vez na elaboración do ADN e prevén os problemas de anemia megaloblástica, un trastorno polo cal a medula ósea produce menos glóbulos vermellos de forma ovalada.
Síntomas de falta de vitamina B12
Os síntomas da carencia de vitamina B12 ás veces non son moi manifestos. Con todo, hai persoas que adoitan experimentar sensación de formígueo ou ardor na pel relacionado coa parestesia. Así mesmo, é probable que xurdan momentos de falta de coordinación e de perda e redución notable dos reflexos.
O déficit de vitamina B12 afecta, principalmente, ao cerebro e ao sistema nervioso, polo que a persoa experimenta confusión mental e alteración da memoria. É probable que aparezan tamén problemas gastrointestinais, sobre todo falta de apetito e estrinximento, así como sensación de debilidade e cansazo xeneralizado, falta de alento, mareos e visión borrosa.
Consecuencias da falta de vitamina B12
Unha das principais consecuencias da carencia de vitamina B12, como xa vimos antes, é a aparición da anemia megaloblástica. O teu organismo sentirase moi canso, con fatiga e con debilidade muscular, ata o punto de ter dificultades para respirar, vertixes, mareos, formígueo nas mans e nos pés e falta de apetito.
Nos casos máis graves, a persoa pode chegar a sufrir danos neurolóxicos. Diversos estudos demostraron que o déficit desta vitamina de forma crónica pode estar na orixe de enfermidades como o alzhéimer, a esclerose múltiple ou a demencia. Tamén é o caso doutros trastornos coma o espectro autista en nenos, a falta de aprendizaxe nos máis pequenos e mesmo os problemas de infertilidade en homes e mulleres.
É pois necesario que leves unha correcta alimentación coa que paliar os posibles efectos do déficit de vitamina B12. Peixe, carne de aves, ovos, froitas coma as laranxas e os aguacates, verduras coma o tomate, o cogombro ou a leituga, leite, ameixas ou fígado de res son algúns dos alimentos que debes consumir para manter sempre correctos os niveis desta vitamina no teu corpo.
