![qué es el ácido fólico y para qué sirve](https://www.gadis.es/saludable/wp-content/uploads/2022/08/Que-es-el-acido-folico-y-para-que-sirve.jpg)
Que é o ácido fólico e para que serve?
Unha alimentación sa e equilibrada é fundamental para o teu organismo. Incorporar cada día os nutrientes esenciais que o teu corpo precisa é clave para gozar dun maior benestar xeral. Un destes nutrientes é, precisamente, o ácido fólico. Pero que é o ácido fólico e que función cumpre no organismo?
O déficit de ácido fólico, do mesmo xeito que o déficit doutras vitaminas, ten consecuencias para o organismo. Neste caso, a carencia de ácido fólico pode provocar na persoa palidez na pel, irritabilidade, sensación de mareo e dificultade respiratoria. Nos casos máis graves, a carencia deste nutriente chega a producir episodios de diarrea, perda parcial do sentido do gusto, perda de peso e mesmo estrés, ansiedade e depresión.
Que é o ácido fólico?
O ácido fólico coñécese tamén como folato ou vitamina B9. Trátase dunha vitamina soluble en auga que forma parte do complexo B das vitaminas e que resulta de vital importancia para o organismo. Non en balde, é unha das encargadas da formación daquelas células responsables do crecemento e do desenvolvemento de cada persoa. A inxestión recomendada de ácido fólico varía en función da idade.
Cales son as funcións do ácido fólico no corpo?
Unha vez que sabes que é o ácido fólico, toca coñecer cales son as súas principais funcións no corpo:
- Formación dos ácidos nucleicos DNA e RNA que transportan a información xenética ás células.
- Formación de glóbulos vermellos en combinación coa vitamina B12 (nutriente necesario para evitar a anemia).
- Intervén no desenvolvemento do sistema nervioso.
- Participa na transferencia de moléculas de carbono coas que se sintetizan todo tipo de compostos.
- Favorece un óptimo desenvolvemento do embrión e do feto nas mulleres embarazadas.
- Un nivel estable de ácido fólico contribúe a que a pel, o pelo e as uñas se manteñan sans.
Onde se atopa o ácido fólico?
Do mesmo xeito que resulta importante saber que é o ácido fólico e cales son as súas funcións principais, é necesario coñecer onde o podes atopar:
- Vexetais verdes escuros (brócoli, col, espinacas, acelgas).
- Legumes (fabas, xudías pintas e brancas, garavanzos, lentellas).
- Froitas (aguacate, mango, mouras, laranxas, piña).
- Froitos secos (améndoas, cacahuetes e abelás).
- Cereais enriquecidos ou flocos de avea integral.
- Carne de fígado de tenreira.
Incluír na túa dieta estes alimentos é fundamental para que os teus niveis de ácido fólico se manteñan sempre estables. Así pois, coñecer que é o ácido fólico e cales son as súas funcións principais é algo que debes saber para gozar dunha mellor saúde cada día.